About Us – ruppersharif.com

پیر طریقت رہبر شریعت خواجہ محمود جی عثمانی رحمتہ اللہ علیہ کا مزار مبارک پنڈوڑہ مسجد عثمانیہ کے ساتھ متصل ہے۔ محمودیہ قبرستان کی وجہ شہرت بھی آپ ہی کی نسبت سے ہے

خانقاہ عالیہ نقشبندیہ مجددیہ روپڑ شریف کےموسس اول پیر طریقت رہبر شریعت خواجہ کمال الدین عثمانی رحمتہ اللہ علیہ ہیں جو کہ بانی ٔ روپڑ شریف خواجہ شیخ احمد جی عثمانی رحمتہ اللہ علیہ کے والد گرامی تھے۔ آپ کی پیدائش شاہ لال مقبوضہ کشمیر میں ہوئی، آپ کے تین صاحبزادے تھےمزید پڑھیں

مرکز انوار و تجلیات مزار مبارک بانی درگاہِ عالیہ نقشبندیہ مجددیہ روپڑ شریف خواجہ شیخ احمد عثمانی رحمتہ اللہ علیہ

حضرت خواجہ شیخ احمد جی قدس اﷲ سرہ العزیز حضرت خواجہ محمد نامدار نتھیالوی قدس اﷲ سراہ العزیز کے مرید اور خلیفہ بھی تھے۔ علوم ظاہری و باطنی کے جامع اور حقیقی اور مجازی رموز سے واقف اور جذب اور استغراق اور ذوق اور شوق کے اوصاف میں موصوف اور سخاوت میں مشہور تھے۔ مذہب حنفی میں فروغ رکھتے تھے اور طریقت میں حضرت خواجہ امام ربانی مجدد الف ثانی شیخ احمد سرہندی کی طرح بدعت اور شرک کے فاطع اور اُمور شرعیہ میں مضبوط اور مستحکم تھے۔
مزید پڑھیں

کتاب اﷲ اور سنت رسول اﷲ ﷺ پر مکمل عمل کرنے والے تھے۔ جملہ صحابہ کرام رضوان اﷲ علیہم کو ہدایت کا سرچشمہ سمجھتے تھے ۔ رات اور دن ہر وقت وعظ و نصیحت اور طالبوں کی توجہ میں مشغول رہتے تھے۔ وحدت کا نور ان کی پیشانی مبارک سے ہمیشہ شعلہ مارنے والا ہوتا تھا۔ جب مہربانی کی نظر طالبوں پر ڈالتے۔ اُسی وقت ان پرذوق الہٰی سے وجد و جوش پیدا ہو جاتا۔ حضرت کی جو کوئی بھی زیارت کرتا بے خود ذکر الہٰی جاری ہوجاتا تھا۔ آپ کی نسبت خلیفہ راشد سوم سیدنا عثمان بن عفان رضی اللہ عنہ سے جناب سرور کائنات حضرت محمد مصطفی ﷺ تک پہنچتی ہے۔ آنحضرت ؒ کی ولادت باسعادت کشمیر موضع شعلال کے ایک موہڑے میں ہوئی۔آپ کے پنجاب میں آنے کا سبب اس طرح ہوا کہ پہلے طریقہ قادریہ میں اپنے والد بزرگوار سے شرف بیعت حاصل کر کے خلافت کا حکم حاصل کر چکے تھے لیکن اپنے والد بزرگوار کی طرف سے حکم تھا کہ تیرے وجود سے خلق خدا کو زیادہ تر فیض طریقہ عالیہ نقشبندیہ سے ہو گااسی لیے آپ طریقہ نقشبندیہ عالیہ کسی خدا کے کامل مرد کی تلاش میں کشمیر سے پنجاب کے ملک کی طرف رجوع کیا۔ خواجہ شیخ احمد جی عثمانی رحمتہ اللہ علیہ جب پہلی مرتبہ قبلہ عالم سید محمد نامدار شاہ المعروف ہادی پاک رحمتہ اللہ علیہ کی ملاقات کے لیے تشریف لے گئے تو معلوم ایسا ہوتا تھا کہ وہ آپ کے انتظار میں ہیں، چار پائی پر بیٹھے ہیں اور یاروں سے فرما رہے ہیں کہ آج ایک شہباز آ رہا ہے جو کہ ہمارے دام میں داخل ہو گا۔ دور سے دیکھ کر چار پائی سے اُٹھ کھڑے ہوئے۔ حضرت نے السلام علیکم کہا۔ قبلہ عالم ؒ نے وعلیکم السلام کہہ کر سینے سے لگایا اور مصافحہ کے بعد حضرت کا ہاتھ پکڑ کر چارپائی پر بٹھلایا اور آپ نیچے بیٹھ گئے۔ اس حقیقت سے حاضرین مسجد نے اپنے دل میں کہا کہ یہ کیسا بے ادب آدمی ہے کہ قبلہ عالمؒ نیچے اور یہ چار پائی پر بیٹھ گیا ہے۔ جب حضرت ؒ نے ان کی پوشیدہ گفتگو سنی۔ زبان درفشان سے فرمایا۔ الا مر فوق الادب پھر تمام حاضرین خاموش ہوگئے اور حضرت ؒ خود بھی چارپائی سے اتر کر قبلہ عالم کے پاس زمین پر بیٹھ گئے۔ حضرت قبلہ عالم ؒ کے ہمنشین بیان کرتے ہیں کہ آنحضرت ؒ کے آنے سے پہلے چار دن قبلہ عالمؒ فرماتے تھے کہ زمین تیار ہے لیکن بیج ڈالنے کی ضرورت ہے اور چراغ اور تیل اور بتی موجود ہے لیکن آگ لگانے کی ضرورت ہے۔ شہباز تیار ہے لیکن رسی چھوڑنی باقی ہے۔ حضرت ؒ کے پہنچنے سے پہلے یہ تین اشارے فرماتے تھے۔حاضرین مجلس نے قبلہ عالمؒ سے اس ماجرا کی حقیقت اور راز سے پوچھا فرمایا کہ خاموش رہو کہ یہ راز ظاہر کرنے کے لائق نہیں۔ پس حاضرین مجلس خاموش ہوگئے۔ جب حضرت خواجہ شیخ احمد ؒ تشریف لائے تو انہوں نے سمجھا کہ وہ اشارے اسی شہباز کی طرف تھے۔ حضرت موصوف نے ایک ہفتہ بحیر رتیال میں رہ کر قبلہ عالم سے بیعت کا شرف حاصل کیا۔ حسب الحکم پھر حضرت ؒ کشمیر سےروپڑ کلاں مقیم ہوئے ۔

آپ کا وصال مبارک 14 شوال 1284 ھ بمطابق 8 فروری 1868 عیسوی بروز ہفتہ آپ اس دنیا سے ہزاروں محبین کو داغ مفارقت دے گئے۔ آپ کا مزار مبارک روپڑ شریف میں اہل محبت کے لیے فیوض و برکات کا سر چشمہ ہے جہاں تشنگانِ عشق و مستی اپنی پیاس بجھاتے ہیں۔ آپ کے تین صاحبزادے تھے اول خواجہ فقیر محمد عثمانی، دوئم خواجہ مفتی حافظ محمد امین عثمانی مستالوی، اور تیسرے خواجہ حبیب اللہ عثمانی۔ خواجہ فقیر محمد عثمانی رحمتہ اللہ علیہ اور خواجہ حبیب اللہ عثمانی رحمتہ اللہ علیہ کا مزار مقدس روپڑ شریف میں ہے جبکہ خواجہ حافظ محمد امین عثمانی رحمتہ اللہ علیہ کامزار مستال شریف اسلام آباد میں ہے۔

سجادہ نشین دوم خانقاہِ عالیہ نقشبندیہ مجددیہ روپڑ شریف محبوب ربانی مقبول صمدانی شیخ المشائخ حضرت خواجہ فقیر محمد عثمانی رحمتہ اللہ علیہ

آپ کی ولادت با سعادت روپڑ شریف میں ہوئی، علم دین میں مہارت تامہ حاصل تھی عام فرمایا، اس دور میں ایک درس گاہ کا اجراء کیا جہاں اپنے زمانے کے بہت بڑے فقیہ تھے۔ آپ نے روپڑ شریف میں علم و عمل شریعت و طریقت کو سے دور و نزدیک سے آئے ہوئے تشنگان علم حاصل کر نے کے ساتھ ساتھ سلوک کو منازل بھی طے کرتے تھے۔ آپ سے ہزاروں محبین نے فیض پایہ ، آپ کے آٹھ صاحبزادے تھے
مزید پڑھیں

حضرت صاحبزادہ حافظ محمد عبدالحق، آپ بحکم شیخ سرکال کسر ہجرت فرما گئے تھے۔
جامع علوم صاحبزادہ علامہ پیر طریقت محمد سلیمان عثمانی رحمتہ اللہ علیہ، آپ کی نرینہ اولاد نہیں تھی اور مدفن روپڑ شریف ہی ہے۔
حضرت صاحبزادہ قاضی فضل احمد عثمانی رحمتہ اللہ علیہ، آپ بحکم شیخ سرکال کسر ہجرت فرما گئے تھے۔
پیر طریقت رہبر شریعت، حضرت پیر حافظ محمد عبدالرب عثمانی رحمتہ اللہ علیہ، سجادہ نشین دربار عالیہ نقشبندیہ روپڑ شریف۔
صاحبزادہ پیر حافظ عبدالھادی عثمانی رحمتہ اللہ علیہ
صاحبزادہ پیر عبدالخالق عثمانی رحمتہ اللہ علیہ
صاحبزادہ پیر عبدالغنی آپ گاوں وریام ملوکڑہ میں دفن ہیں۔
صاحبزادہ پیر عبدالقدوس عثمانی رحمتہ اللہ علیہ

قبلہ عالم خواجہ فقیر محمد عثمانی رحمتہ اللہ علیہ نے اپنے تین صاحبزادگان پیر طریقت رہبر شریعت صاحبزادہ عبدالحق عثمانی رحمتہ اللہ علیہ اور پیر طریقت رہبر شریعت صاحبزادہ محمد سلیمان عثمانی رحمتہ اللہ علیہ اور پیر طریقت رہبر شریعت صاحبزادہ عبدالرب عثمانی رحمتہ اللہ علیہ کو خلافت اور طریقت کے ارشاد کی اجازت تھی ، خواجہ محمد سلیمان جوانی میں ہی وصال فرما گئے تھے اور نرینہ اولاد بھی نہیں تھی، اس سے پہلے خواجہ عبدالحق عثمانی چک بیلی خان ہجرت فرما چکے تھے ، اسی وجہ سے پیر طریقت رہبر شریعت حافظ خواجہ محمد عبد الرب عثمانی رحمتہ اللہ علیہ کو سجادہ نشین مقر ر کیا گیا۔ قبلہ عالم خواجہ فقیر محمد عثمانی رحمتہ اللہ علیہ کا وصال 15 شوال 1315 ھ بمطابق 8مارچ 1898عیسوی بروز منگل ہوا۔ آپ کا مزار شریف بھی روپڑ شریف میں اپنے والد گرامی کے پہلو میں ہے۔

سجادہ نشین سوم خانقاہِ عالیہ نقشبندیہ روپڑ شریف محبوب ربانی منبع ٔ جود و سخا شیخ المشائخ حضرت خواجہ حافظ محمدعبدالرب عثمانی رحمتہ اللہ علیہ

حضرت خواجہ محمد عبدالرب عثمانی رحمۃ اللہ علیہ کی ولادت باسعادت 24 شعبان المکرم 1291 ہجری بمطابق 24 ستمبر 1874 عیسوی بروز جمعرات کو روپڑ شریف ہی میں ہوئی۔ آپ نے اپنے دور میں آخری عمر تک تبلیغ دین کا اس قدر بیڑا اٹھایا کہ شہر شہر اور گلی کوچوں کو ذکر اللہ سے منور کر دیا۔ آپ کی نگاہ میں یہ اثر تھا۔
مزید پڑھیں

نگاہ ولی میں یہ تاثیر دیکھی بدلتی ہزاروں کی تقدیر دیکھی

بے شمار غیر مسلموں کو مسلمان کیا، اگر کوئی غیر مذہب بھی زیارت کرتا تو اس کی زبان سے یہ جاری ہوتا کہ آپ کے جمال پاک سے حسن یوسف کی جھلک نظر آتی ہے۔ آپ کے ساتھ تبلیغی دورہ میں علمائے ربانی کی ایک جماعت ہوتی تھی جن میں نمایاں نام مولانا مولوی حافظ محمد بخش صاحب ساؤ والوی جن کا تعلق تحصیل پنڈدادنخان سے ہے اور مولانا عبدالرحیم صاحب چکوال والے، کے ہیں ۔ غیرہان مبلغین نے آپ کی معیت میں شب و روز اہل اسلام کو دین حق پر استقامت اور اتباع سنت مصطفوی پر عمل کی ہدایت فرمائی اور اولیاء اللہ کی صحبت سے لوگوں کو آگاہ کیا۔ آپ کو ایک نظر دیکھتے ہی ہزاروں بدنصیب با نصیب اور ہزاروں بدکار نیکوکار ہو جاتے۔ آپ کا تقویٰ اسحد تک تھا حقہ پینے الے اور مقطوع الریش کو نماز کی صف اول میں نہ کھڑا ہونے دیتے۔ آپ کے دور میں کوئی سنگی داڑھی منڈا نظر نہ آتا۔ جب کوئی دارھی منڈا آپ کے سامنے آتا تو آپ بڑے پیار سے اپنی ریش مبارک پر ہاتھ پھیرتے اور اس کے منہ پر بھی ہاتھ پھیر کر فرماتے کہ بیٹا تو حجام کو دانے زیادہ دیتا ہے۔ اس لیے وہ تیری دارھی کا صفایا کرتا ہے میں نے حجام کو کبھی دانے نہیں دیئے۔ اس لیے وہ میری داڑھی کو نہیں چھیڑتا۔آپ کے ان الفاظ میں اتنی برکت تھی کہ سینکڑوں بے ریش اسی وقت توبہ کر لیتے اور دوسری ملاقات میں باریش نظر آتے۔

آپ کاحسن و جمال رومی رحمۃ اللہ علیہ کے اس شعر کی تفسیر تھا۔

پیر کامل صورت ظل الہٰ یعنی دید پیر دیر کبریا

آپ بحمداللہ بے شمار کرامات اور کمالات کے حامل تھے۔ اگر آپ کے کمالات اور کرامات کی جھلکیاں دیکھنی ہوں تو فیض عثمانیہ اور کمالات عثمانیہ کا مطالعہ کریں۔

مزار مبارک خواجہ شیخ احمد جی عثمانی رحمتہ اللہ علیہ

مزار مبارک پیر طریقت رہبر شریعت، حضرت پیر حافظ محمد عبدالرب عثمانی رحمتہ اللہ علیہ، سجادہ نشین دربار عالیہ نقشبندیہ روپڑ شریف

آپ کا وصال مبارک 6 رمضان المبارک1362ھ بمطابق 7 ستمبر 1943 عیسوی بروز منگل روپڑ شریف میں ہوا۔ آپ کی عمر شریف ستر سال چودہ دن تھی۔ آپ کا مزار پاک آپ کے آباؤ اجداد کے مزارات کے ساتھ واقع ہے ۔
مزید پڑھیں

حضرت خواجہ محمد عبدالرب عثمانی رحمۃ اللہ علیہ کے چار صاحبزادے تھے پہلے حضرت صاحبزادہ محمدعبدالحنان جن کا وصال بحالت شباب ہوا۔ دورے جناب صاحبزادہ محمد عبدالحئی صاحب جو سجادہ نشین گزرے۔ آپکا مزار بھی دربار شریف کے باہر الگ دربار بنا ہوا ہے۔ تیسرے صاحبزادہ محمد عبدالقیوم بحالت طفولیت فوت ہوئے۔ چوتھے صاحبزادہ عبدالباقی صاحب جن کا وصال1968ء میں روپڑ شریف میں ہوا اور یہ بھی روضہ شریف کے قریب مدفون ہیں۔

سجادہ نشین چہارم خانقاہِ عالیہ نقشبندیہ روپڑ شریف محبوب ربانی غوث زماں شیخ المشائخ حضرت خواجہ حافظ محمدعبدالحئی عثمانی رحمتہ اللہ علیہ

آپ کی ولادت باسعادت روپڑ شریف میں ہوئی ، آپ نے ابتدائی تعلیم دربار شریف میں ہی حاصل کی، بعد ازاں ادھوال سکول میں داخلہ لیا، جب آپ ساتویں جماعت کے طالب علم تھے تو سرکار دو عالم نور مجسم شفیع معظم جناب محمد رسول اللہ ﷺ کی زیارت سے مشرف ہوئے۔ باباجی فرماتے ہیں میں سکول جارہا ہوں اور بڑالہ کی اترائی اتر رہا تھا کہ ایک قافلہ دکھائی دیا جس کے سالار کی خوبصورتی دیکھ کر میں بے خود سا ہو گیا کیفیت عجیب طاری ہو گئی، دیکھتا کیا یوں کہ دیکھتا ہی رہ گیا اور قافلہ گزر گیا میں آخری بندے سے پوچھتا ہوں کہ یہ پاک ہستی کون ہیں تو وہ فرمانے لگے یہ سرکار دو عالم ﷺ ہیں میں دوڑا ہوا سرکا ر ﷺ کے قریب پہنچتا ہوں حضورﷺ متوجہ ہوتے ہیں میں ملاقات کا شرف حاصل کرتا ہوں آپ ﷺ کرم فرماتے ہیں اور پوچھتے ہیں عبدالحئی کہاں جا رہے ہو؟ میں جواب دیتا ہوں حضور ﷺ سکول جا رہا ہوں۔ آپ فرماتے ہیں تیرے لیے تو ہم نے اور حصہ رکھا ہے تو کدھر جا رہا ہے۔ اچانک آنکھ کھل گئی قبلہ عالم خواجہ محمد عبدالرب عثمانی کو سارا واقع بیان کیا آپ نے مبارکباد دی اور حکم فرمایا آپ سے سکول بند اور دینی تعلیم کا آغاز کرو۔

سجادہ نشین پنجم خانقاہِ عالیہ نقشبندیہ مجددیہ روپڑ شریف پیرزادہ محمدعثمان عثمانی

دینی تعلیم آستانہ عالیہ میں ہی آغاز کیا لیکن کچھ ہی وقت میں احساس ہوا کہ گھر میں رہ کر تعلیم حاصل کر نا مشکل ہے، والد گرامی سے اجازت طلب کی کہ مدرسہ میں داخلہ لے لوں؟ لیکن قبلہ حضرت خواجہ محمد عبدالرب عثمانی رحمتہ اللہ علیہ نے اجازت نہیں فرمائی۔ بعد میں آپ تعلیم حاصل کرنے پنجائین چکوال تشریف لے گئے جہاں ابتدائی موقوف الیہ کتب سے مولانا قاضی ثنا اللہ رحمتہ اللہ علیہ سے استفادہ کیا پھر موہڑہ کدلتھی قاضی عبداللہ جو کہ قاضی ثنا اللہ رحمتہ اللہ علیہ کے بیٹے تھے، اُن سے استفادہ کیا۔ابتدائی کتب کے بعد مکمل موقوف الیہ اور فنون کا علم قاضی رسول احمد بھترالوی رحمتہ اللہ علیہ سے بھترال میں حاصل کیا(مخزن ِعلم و عمل، ص ۲۲)۔ اس کے بعدمولانا قاضی شمس الدین صاحب سے دارا والی مسجد پنڈیگھیب میں دورہ حدیث شریف شروع کی اُس وقت وہاں مشکوۃ شریف جاری تھی کچھ عرصہ استفادہ کیا لیکن دل مطمئن نہ ہواتو دورہ تفسیر قرآن شریف و دورہ حدیث شریف مولانا سیدمحمد ابوالبرکات شاہ صاحب حزب الاحناف لاہور چلے گئے توتقریباً ۲ یا اڑھائی سال میں سند فراغت حاصل کی۔ اس کے بعد حکمت کے لیے بمبئی کا سفر کیا جہا ں مولانا سید احمد صاحب کے پاس رہے وہاں آپکی رہائش خواجہ عبدالرب عثمانی کے مرید خاص حاجی دوست محمدکے پاس رہی وہاں اُن کا چاکلیٹ کا کارخانہ تھا، حاجی صاحب کا آبائی گاؤں موہڑہ مہیال مسہ کسوال گوجرخان ہے۔ قبلہ باباجی رحمتہ اللہ علیہ تقریباً تیرہ یا چودہ ماہ وہاں قیام پذیر رہے۔
مزید پڑھیں

علوم و فنون نے مکمل فراغت کے بعد آپ 1932 میں روپڑ شریف واپس تشریف لے آئے، اسی دوران آپ کی ہمشیرہ محترمہ کا انتقال ہو گیا۔ خواجہ محمد عبدالرب عثمانی رحمتہ اللہ علیہ کو اپنی بیٹی کی موت کا بہت صدمہ ہوا، آپ ہر وقت اپنی نواسی کو اُٹھائے رکھتے اور خود ہی بچی کی کفالت کر نے لگے، لیکن اولیاء کرام پر اللہ رب العزت کی طرف سے آزمائش و ابتلاء بہت آتی ہیں وہ بچی بھی انتقال کر گئی، آپ اس کے بعد حالت استغراق میں رہے، اسی وجہ سے خواجہ محمد عبدالحئی عثمانی رحمتہ اللہ علیہ والد گرامی کی حیات طیبہ میں ہی خانقاہی نظام کا انتظام انصرام کرنے لگے۔

آپ کو خلافت و اجازت کی سعادت اپنے والد مکرم حضرت خواجہ محمد عبدالرب عثمانی رحمۃ اللہ علیہ سے حاصل ہوئی تھی۔ اسلاف کی طرح تبلیغ دین کےلیے سال کا اکثر حصہ علمائے کرام کی رفاقت میں تبلیغ دین کی اور نہایت پسماندہ جگہ پر پہنچ کرذکر الٰہی سے بندگان ِخدا کے دلوں کو جلا بخشی اور سابقہ خواجگان کی سنت پر (تبلیغ دین) اس طرح تندہی سے عمل کیا جس کی مثال نایاب ہے۔ آپ نے عمر کے آخری حصے تک پیغامِ خداوندی سال بسال بندگان خدا کے کانوں تک پہنچایا۔ رفیق سفر علماء میں مولانا محمد بخش صاحب ساؤ والوی اور مولانا مولوی عبدالرحیم صاحب چکوالوی مولانا الحاج محمد منظور الٰہی صاحب شیرپوری اور علامہ قاری غلام حسین چشتی چک باقر شاہ نے رفاقت کی سعادت حاصل کی۔

آپ نے رہائشی مکانات کی تعمیر، عرس مبارک پر آنے والے مہمانوں کی قیام گاہیں اور خواجگان کے مزارات پر روضہ شریف کی تعمیر اور مسجد کی تعمیر از سرِ نو کا اہم کام بہت احسن طریقے سے کروایا۔

خواجہ محمد عبدالحئی عثمانی رحمتہ ا للہ علیہ کو اللہ تعالیٰ نے دو دفعہ حاضری حرمین شریفین کی سعادت سے ہمکنار فرمایا۔ پہلی دفعہ 1951 میں حج کیا اور دوسری دفعہ 1981 میں حج کی سعادت حاصل ہوئی

قبلہ حضرت صاحب کو رب ذوالجلال نے بے شمار کمالات اور کرامات سے نوازا ہے۔ آپ کے کمالات اور کرامات سے روشناس ہونا ہو تو فیض عثمانیہ اور کمالات عثمانیہ کا مطالعہ کریں۔

حضرت خواجہ محمد عبدلحئی عثمانی رحمتہ اللہ علیہ نے زندگی کے آخری تین سال مورگاہ گزارے، حضرت خواجہ محمد عبدالحئی عثمانی رحمتہ اللہ علیہ 19مارچ 2007ء کو بوقت صبح 11:05 بمطابق (29سفرالمظفر1428 ھ)پر اس دنیائے فانی سے ہزاروںمحبین و متوسلین کو داغ مفارقت دے گئے۔ انا للہ وان الیہ راجعون، آپ کا جنازہ پیر طریقت رہبر شریعت حضرت علامہ پیر غلام محی الدین سلطان دامت برکاتہم العالیہ مورگاہ شریف، نے20 مارچ 2007ء صبح 10:00 بجے روپڑ شریف بمطابق (یکم ربیع الاول 1428 ھ) کو پڑھایا آپ صاحبزادہ محمد عثمان عثمانی کے استاذ بھی ہیں۔ آپ کے جنازہ میں ہزاروں متوسلین کے علاوہ علاقہ بھر کے علماء و مشائخ اور عقیدت مندوں نے شرکت کی۔ 19 اور 20 مارچ کی درمیانی شب ساری رات ابر رحمت برستی رہی گویا کہ آسمان بھی رو رہا تھا لیکن جنازہ کے وقت اچانک بارش تھم گئی لوگوں نے دیکھا ایک بادل آپ کی چارپائی پر سایہ کیے ہوئے تھا۔

حضرت خواجہ محمد عبدالحئی عثمانی رحمتہ اللہ علیہ کے تین صاحبزادے ہیں۔ سب سے بڑے صاحبزادے جناب محمد مطیع الرحمن عثمانی صاحب، دوسرے جناب صاحبزادہ محمدعبدالقیوم عثمانی رحمتہ اللہ علیہ، تیسرے جناب صاحبزادہ محمد معصوم عثمانی صاحب، اللہ تعالیٰ اس خاندان عثمانیہ کو ہر قسم کے حوادث کی دست برد سے بچا کر تا قیام قیامت سلامت رکھے۔

سجادہ نشین پنجم خانقاہِ عالیہ نقشبندیہ مجددیہ روپڑ شریف پیرزادہ محمدعثمان عثمانی

ولادت 12فروری 1984 کو راولپنڈی میں ہوئی ۔پرورش دادا جی پیرخواجہ محمد عبدالحئی عثمانی رحمتہ اللہ علیہ نے کی قبلہ والد گرامی بھی خدمت میں پیش پیش تھے لیکن سکونت دادا جی کے پاس رہی،بعد ازاں پڑھائی کی غرض سے صاحبزادہ محمد مطیع الرحمن عثمانی کی بڑی ہمشیرہ کی کفالت میں رہے۔
مزید پڑھیں

پیرزادہ محمد عثمان کی سجادہ نشینی میں مندرجہ ذیل ترقیاتی کام ہوئے

٭ جامعہ عثمانیہ محی العلوم روپڑ شریف کا قیام

٭ طہارت خانوں کا قیام

٭ مزار مبارک خواجہ پیر محمد عبدالحئی عثمانی رحمتہ اللہ علیہ کا قیام

٭ توسیعی منصوبہ جامع مسجد عثمانیہ روپڑ شریف

٭ جامعہ عثمانیہ محی العلوم روپڑ شریف، رہائشی بلاک کا قیام

٭ مستقل لنگر خانے کا قیام

٭ اساتذہ کی رہائشیں، لائبریری اور کمپیوٹر لیب اور ایڈمنسٹریشن بلاک کا قیام

٭مسجد و مدرسہ کے فرنٹ بلاک کا قیام

٭مسجد و مدرسہ کے سولر سسٹم کی تنصیب
مزید پڑھیں

پیر طریقت رہبر شریعت خواجہ محمود جی عثمانی رحمتہ اللہ علیہ کا مزار مبارک پنڈوڑہ مسجد عثمانیہ کے ساتھ متصل ہے۔ محمودیہ قبرستان کی وجہ شہرت بھی آپ ہی کی نسبت سے ہے

مرکز انوار و تجلیات مزار مبارک بانی درگاہِ عالیہ نقشبندیہ مجددیہ روپڑ شریف خواجہ شیخ احمد عثمانی رحمتہ اللہ علیہ

سجادہ نشین دوم خانقاہِ عالیہ نقشبندیہ مجددیہ روپڑ شریف محبوب ربانی مقبول صمدانی شیخ المشائخ حضرت خواجہ فقیر محمد عثمانی رحمتہ اللہ علیہ

سجادہ نشین سوم خانقاہِ عالیہ نقشبندیہ روپڑ شریف محبوب ربانی منبع ٔ جود و سخا شیخ المشائخ حضرت خواجہ حافظ محمدعبدالرب عثمانی رحمتہ اللہ علیہ

مزار مبارک خواجہ شیخ احمد جی عثمانی رحمتہ اللہ علیہ

سجادہ نشین پنجم خانقاہِ عالیہ نقشبندیہ مجددیہ روپڑ شریف پیرزادہ محمدعثمان عثمانی

سجادہ نشین پنجم خانقاہِ عالیہ نقشبندیہ مجددیہ روپڑ شریف پیرزادہ محمدعثمان عثمانی

پیرزادہ محمد عثمان کی سجادہ نشینی میں مندرجہ ذیل ترقیاتی کام ہوئے

Copyright © Ruppersharif. All Rights Reserved.